ԵՐԿՈՒ ԸՆԿԵՐՆԵՐԸ

ԵՐԿՈՒ ԸՆԿԵՐՆԵՐԸ

Հրակն ու Կարէնը մանկութեան մտերիմ ընկերներ էին։ Անոնք միշտ միասին կը խաղային եւ իրարու կ’օգնէին:

Ժամանակի ընթացքին անոնց ճամբաները իրարմէ բաժնուեցան*: Անոնց կեանքերն ալ տարբեր ձեւերով ընթացան: Տարիներ անցան եւ Հրակ շատ հարստացաւ, սակայն Կարէն, հակառակ որ աշխատասէր էր, չէր կրնար բաւարարել իր կնոջ եւ երեք զաւակներուն բոլոր պէտքերը: Անոնք կ’ապրէին փոքր հիւղակի* մը մէջ, երբեմն զուրկ* նուազագոյն* պիտոյքներէ*:

Օր մը, Կարէնին կինը կը թելադրէ ամուսինին, որ երթայ եւ իր հարուստ ընկերէն օգնութիւն խնդրէ։ Կարէն սկիզբը չ’ուզեր, բայց ի վերջոյ, զաւակներուն սիրոյն, կ’որոշէ երթալ։

Հրակ կ’ապրէր փառահեղ* դղեակի մը մէջ։ Կարէն, երբ կը մօտենայ անոր դարպասին*, պահակները կ’արգիլեն իր մուտքը։ Կարէն կը խնդրէ անոնցմէ, որ տեղեկացնեն Հրակը, թէ իր մանկութեան ընկերը՝ Կարէնը, եկած է զինք տեսնելու։

Հրակ անմիջապէս կը փութայ անձամբ դիմաւորելու Կարէնը. դարպասին դիմաց երկու ընկեր կը գրկախառնուին* ու կը համբուրուին, մինչ պահակները զարմացած կը դիտեն, թէ իրենց հարուստ տէրը ի՛նչ գործ ունի աղքատիկ տեսքով այդ մարդուն հետ: Հրակ տուն կը հրաւիրէ Կարէնը ու ճոխ կը հիւրասիրէ զայն: Անոնք ժամերով կը զրուցեն վերյիշելով իրենց մանկութեան անուշ օրերը։

Ժամանակը արագ կ’անցնի, սակայն Կարէն կ’ամչնայ ընկերոջմէ օգնութիւն խնդրելու եւ առանց այդ նիւթին շուրջ բառ մը իսկ ըսելու, հրաժեշտ կ’առնէ Հրակէն:

Վերադարձի ճամբուն վրայ ան մի քանի այլ ծանօթներու եւ վայրեր կը հանդիպի, ուշացնելով տուն ժամանումը*, մտածելով թէ ի՛նչ պիտի ըսէր կնոջ, որ յուսախաբ պիտի ըլլար իրմէ՝ ձեռնունայն* վերադարձած ըլլալուն պատճառով:

Ժամեր կ'անցնին. Կարէն այլեւս չէր կրնար աւելի ուշանալ: Ինչ ալ ըլլար, հարկ էր տուն երթալ եւ մտածել այլ ելքի մը մասին: Վարանոտ* քայլերով կը բռնէ տան ճամբան: երբ կը մօտենայ, կը տեսնէ թէ կինն ու զաւակները նոր հագուստներ հագած էին, իսկ գործաւորներ նուէրներ կը փոխադրէին բեռնաւորուած* կառքէ մը, մինչ շինարարի* հագուստով մարդիկ տան քովի հողը կը չափչփէին նոր տուն կառուցելու համար։

Կարէն կը հասկնայ, թէ ինք որքա՜ն բախտաւոր է Հրակին նման ազնիւ եւ հաւատարիմ ընկեր մը ունենալուն համար, որ առանց իր խնդրելուն, հասկցած էր անոր վիճակը եւ յարգած՝ անոր արժանապատւութիւնը:

Հետեւեալ հարցումներէն իւրաքանչիւրին տրուած 3 հաւանական պատասխաններէն փորձէ՛ ընտրել ճիշդը։

1. Կարէն ինչո՞ւ չ’ուզեր ընկերէն օգնութիւն խնդրել։
Որովհետեւ չէր փափաքեր ընկերը տեսնել։
Որովհետեւ կ’ամչնար ընկերէն օգնութիւն խնդրելու։
Որովհետեւ չէր ուզեր կնոջ փափաքը կատարել։
2. Հրակ ինչպէ՞ս կը դիմաւորէ Կարէնը։
Մի քանի ժամ սպասցնելէ ետք պաղութեամբ կը դիմաւորէ Կարէնը։
Չ’ընդունիր, պատճառաբանելով զբաղած ըլլալը։
Անձամբ եւ ջերմօրէն կը դիմաւորէ Կարէնը։
3. Ի՞նչ է այս պատմուածքին պատգամը։
Պէտք է միշտ օգնութիւն խնդրել մտերիմ ընկերներէ։
Անկեղծ բարեկամը կը հասկնայ ընկերոջ կարիքները եւ կ’օգնէ անոր՝ առանց որ ան խնդրէ իրմէ։
Հարուստները միշտ կ'ընդառաջեն իրենց բարեկամներուն խնդրանքին։