ԿԱԽԱՐԴԱԿԱՆ ԾԱՌԸ

Փոքրիկ տղեկ մը, երբ կը պտըտէր հանրային պարտէզին մէջ, կը տեսնէ ծառ մը, որուն վրայ գրուած էր. «Ես հրաշագործ ծառ եմ: Ըսէ՛ք կախարդական բառերը եւ տեսէք թէ ինչե՜ր պիտի պատահին»։

Տղեկը կը փորձէ զանազան բառեր, որոնք կարդացած էր գիրքերու մէջ կամ լսած էր ֆիլմերէ, բայց ապարդիւն*. ո՛չ «ապրաքատապրա»-ն, ո՛չ «հոքուս-փոքուս»-ը, ո՛չ ալ «բացուի՛ր սեզամ»-ը արդիւնք կու տան։ Ուստի բարկացած, ոտքով բազմիցս կը հարուածէ ծառի բունին: Այս բոլորէն յոգնած կը նստի դիմացի նստարանին:

Ատեն մը ետք, կը զղջայ ըրածին ու ծառին դիմելով կ’ըսէ.

-- Սիրելի՛ ծառ, ներողութիւն կը խնդրեմ ըրածիս համար: Ինչ ալ ըլլար, պէտք չէ զարնէի քեզի, բայց շա՛տ կը փափաքէի գաղտնիքդ իմանալ: հաճիս ներէ՛ ինծի եւ եթէ կ'ուզես՝ օգնէ, որ գիտնամ հրաշքդ ի՛նչ է, շա՜տ կը խնդրեմ։

Յանկարծ ճռնչալով* դուռ մը կը բացուի ծառին կոճղին* մէջ։ Տղեկը շատ կ'ուրախանայ, որ ծառը լսեց իր խնդրանքը: Կը փորձէ մտնել, սակայն շատ մութ էր ներսը, ուստի նորէն կը դիմէ ծառին.

-- Շնորհակալ եմ, սիրելի՛ ծառ, որ լսեցիր խնդրանքս։ Վստահ եմ, որ աւելի հրաշալի բաներ պահած ես ներսը: Կրնա՞մ անոնք ալ տեսնել քու արտօնութեամբդ:

Այս խօսքերուն վրայ ծառին խոռոչը* կը լուսաւորուի եւ տղեկը ներս կը մտնէ ու կը տեսնէ բազմաթիւ խաղալիքներ ու համեղ քաղցրաւենիք*։

Տղեկը կը բերէ նաեւ իր ընկերները, որոնք նոյնպէս կ’ըսեն կախարդական խօսքերը՝ «խնդրեմ», «հաճիս», «շնորհակալ եմ», եւ անոնք ալ կ’օգտուին կախարդական ծառին բարիքներէն։

 

Հետեւեալ հարցումներէն իւրաքանչիւրին տրուած 3 հաւանական պատասխաններէն փորձէ՛ ընտրել ճիշդը։

1. Տղեկը հանրային պարտէզին մէջ ինչպիսի՞ ծառ մը կը տեսնէ։

ա- Շատ հսկայ ծառ մը բազմաթիւ ճիւղերով։

բ - Կախարդական ծառ մը վրան գրութիւնով։

գ – Չափազանց գեղեցիկ ծառ մը։

2. Ի՞նչ էին այն բառերը, որոնք բացին դուռ մը ծառին կոճղին եւ լուսաւորեցին ծառը։

ա- Բարեւ եւ սիրելի։

բ – հիանալի եւ սքանչելի։

գ – Ներողութիւն, խնդրեմ եւ շնորհակալութիւն։

3. Տղեկը ծառէն ի՞նչ կը սորվի։

ա- Ծառերուն մէջ խաղալիքներ պահուած կ'ըլլան։

բ – Կախարդական ծառերը պահանջկոտ կ’ըլլան։

գ – Պէտք է քաղաքավար ըլլալ նպատակին հասնելու համար։