ԽՄԲԱԳՐԱԿԱՆ ՅՕԴՈՒԱԾՆԵՐ

ԾԱՌԵՐ

ՓԹԻԹ-ի այս թարմացումը նուիրուած է բնութեան եւ մանաւանդ բուսականութեան ամէնէն կարեւոր բաղադրիչներէն* մէկուն՝ ծառին։

Ծառերը կարելի է բաժնել հիմնական երկու խումբի՝ դիւրաթափ (deciduous) եւ կոնաբեր (coniferous)։

Դիւրաթափ ծառերը աշնան իրենց տերեւները կը կորսնցնեն։ Անոնց տերեւները կ'ըլլան աստղաձեւ, սրտաձեւ կամ հաւկթաձեւ։ Պտղատու ծառերուն մեծամասնութիւնը դիւրաթափ է։

Կոնաբեր ծառերը ընդհանրապէս մշտադալար կ'ըլլան. այսինքն անոնք իրենց տերեւները քիչ-քիչ բոլոր եղանակներուն կը կորսնցնեն եւ ամբողջ տարուան ընթացքին կանաչ կը մնան։ Անոնք կը գոյատեւեն նոյնիսկ անբերրի հողի մէջ, մեծ ուշադրութիւն կամ խնամք չեն պահանջեր եւ շատ երկար կ'ապրին, տասնամեակներ եւ նոյնիսկ դարեր։ Հազարամեակներ ապրող կոնաբեր ծառեր շատ կան աշխարհի մէջ, որոնցմէ նշանաւոր է Լիբանանի խորհրդանիշ Մայրի ծառը:

Այս թարմացումով պիտի ծանօթանանք պտղատու եւ մշտադալար ծառերու տեսակներուն։